आइमाई अर्थात उप ! – बलराम तिमिल्सिना 
******

आजसम्म
तिम्रो भूमिका उपकै छ !

तिमी घरमा उप
तिमी समाजमा उप
तिमी गाउमा उप
तिमी सहरमा उप
विद्यालय, मठ मन्दिर
अड्डा अदालत
सबै स्थानमा तिम्रो दर्जा उप !

तिमी आधा मान्छे
त्यसैले तिमी उप
समाजवादउन्मुख गणतन्त्रमा पनि
तिमी निगाह बक्सले उप !

जहिलेसम्म
तिमी विद्रोह गर्ने छैनौ
तिम्रो उप भूमिका प्रति
र कृतज्ञतापूर्वक भनिरहने छ्यौ-
थ्याङ्क यु पुरुष महोदय
तहिलेसम्म तिमी
दोश्रो दर्जाकी मान्छे
आइमाई अर्थात उप ।