कविता : यहाँ यस्तै छ सधैँभरि        – Sarangi News

   यहाँ यस्तै छ सधैँभरि (कविता)     

      रामचन्द्र घिमिरे शास्त्री   

हिँड्छौ रे ! किन गाउँदै भजन यो नेता, विजेताहरू !

तिम्रो छैन कतै कुनै तरहको त्यो मानवी आवरु ?

नाना रङ्ग भरी भरी नयनमा रङ्ग्याइएका कथा

लुक्छन् भित्र गडी गडी कहरमा निस्सासिएका व्यथा ।

 

गर्दै भाषण शब्द शब्द बटुली कुर्ल्यौ कति हो कति ?

लेख्यौ ऐन र कानुनी नियमका जञ्जाल धेरै प्रति

अर्कै रङ्ग भरेर गाडिन पुग्यो तिम्रो यहाँ शालिक

झुक्याएर भयौ गरीब जनका संसारका मालिक

 

खाडीमा कसरी बजारिन पुग्यो यो बैँसको माधुरी ?

यी पाखा वनकुञ्जमा रहरको बज्दैन रे बाँसुरी

आफ्नै चन्द्र र सूर्यको भ्रमणमा लाग्छन् तगाराहरु

आफ्नै विम्ब हराउँदै गगनमा उड्छन् इरादाहरु

 

गर्जन्छन् किन पत्र पत्र बिचमा बेमौसमी बादल ?

मान्छे रोइरहेछ मर्म नबुझी पार्‍यौ सधैँ घायल

फोरी पर्वत श्रृङ्खला अघि बढ्यो त्यो स्वर्णको तस्कर

नाङ्गो जङ्गल पारँदै अघि बढ्यो त्यो चोरको लस्कर

 

कोही सक्छ र ? ज्यूँन मर्न सजिलै हत्या र हिंसा बढ्यो

साँचो बोल्न सकेन खै युवकले आतङ्क छाई रह्यो

पर्दा भित्र लुकी लुकी कति कती दुष्कर्म गर्छन् यहाँ

नाङ्गो नाच रची रची सुजनको अस्तित्व लुट्छन् यहाँ

 

हामीलाई चिनाउने युगभरी हिन्दुत्व खै के भयो ?

हामीलाई बचाउने जग भरी बुद्धत्व खै के भयो ?

हाम्रो राष्ट्र हराउँदै अब कतै पाइन्न जस्तै भयो

ज्यूँदो रूप लिएर गर्व गरँदै बाँचिन्न जस्तै भयो

 

हाम्रा स्वप्निल चित्रमा कलमको पर्दैन रेखाङ्कन

कस्ले पो अब गर्न सक्छ र यहाँ सत्कर्म मूल्याङ्कन ?

जो जोले जति जे भने पनि यहाँ विश्वास नै छैन रे !

मैत्री पूर्ण विचारले हृदयको चोरी गरिँदै छ रे !

                                 समाप्त

*************************************

मध्यनेपाल न.पा. वडा नं.७, चिसङ्कु, करापुटार, लमजुङ

   फोन नम्बर : ९८४९०२३०८७

लेखकलाई फेसबुकमा खोज्न यहाँ छुनुहोस् । 

प्रतिक्रिया

सम्बन्धित खवर

  मंग्सिर ९, २०८० शनिबार 78 Views

लघुकथाको ५५ औँ शृङ्खला

  मंग्सिर ९, २०८० शनिबार 195 Views

बालकविताः हजुरबाको चस्मा

  मंग्सिर ६, २०८० बुधबार 119 Views

बा आमाको माया (बालकविता)

ताजा अपडेट
धेरै पढिएको

लमजुङका अमित रसाईली भ्वाईस अफ नेपालको ब्याटलमा।

पुर्व खेलकुद मन्त्री जगत विश्वकर्मा मर्दी पदयात्रामा, पर्यटकको बढ्दो चाप।

स्व: जगदिश न्यौपाने रनिङ शिल्डमा २१ टिमको सहभागिता।

मध्यनेपाल नगरपालिकामा यात्रु सहायता कक्ष संचालन।

बाल गजल : दसैँ

नवराज विक हत्यामा संलग्न २३ जनालाई जन्मकैद, प्रेमिकालाई जेल सजाय


TOP