दसैँ  (बालकविता)

– लक्ष्मी रेग्मी खनाल`चक्षु´

खेतभरि पहेँलो धान कोदो फुल्यो बारीमा ।

बाबा गए बाँसघारीमा आमा नयाँ सारीमा ॥

बाँस काटेर पिङ बनाई दिनुभयो बाबाले ।

म पनि त ! राम्री भएँ फूलबुट्टे जामाले ॥

घर पोत्नलाई कमेरो र रङ्ग चाहिने रातो ।

पिठो कुट्न गाउँभरी चले ढिँकी जाँतो  ॥

छर्न थाले जमरा , बास्ना आयो रोटीको ।

मलाई पनि दर्शन गर्न मन काली कोटीको ॥

दाजु पनि लाहुरबाट आए बोकाइ भरिया ।

मख्ख परिन् भाउजूदेखि नयाँ फरिया ॥

नौ दिनसम्म नौ देवीको  दुर्गा पूजा गर्ने।

सत्यको जित भई यहाँ असुरहरूले हार्ने ॥

दसैँको दिन रातो टीका यो मन खुसी अति ।

आउन साथी गनौँ पैसा भयो कति कति ॥

पूर्णिमाको भोलिपल्ट स्कुल जानुपर्छ ।

नबिर्सनु साथी हाम्ले होमवर्क गर्नुपर्छ ॥