पोखरा । कास्की रूपा गाउँपालिका, वडा नम्बर २ का वडाध्यक्ष राजन सुवेदीले आफूले वडाध्यक्ष भएवापत पाउने सुविधाको रकम जनताकै लागि खर्च गर्ने प्रतिबद्धता व्यक्त गरेका छन् ।

सुवेदीले शुक्रबार फेसबुकका माध्यमबाट ८ बुँदे प्रतिबद्धतासहित ‘जनताको सेवक बन्छु भनेर जनप्रतिनिधि बन्ने आकाङ्क्षा राखेकाले जागिरे नभई सेवक नै बन्ने’ घोषणा गरेका हुन् । उनले सञ्चार, यातायात, पत्रपत्रिका, बैठक भत्तालगायत सबै सुविधा व्यक्तिगत प्रयोजनका लागि प्रयोग नगरी रूपाका ७ ओटै वडाका जनताका लागि खर्च गर्ने प्रतिबद्धता व्यक्त गरेका छन् ।

गत वैशाख ३० गते सम्पन्न स्थानीय तहको निर्वाचनबाट उनी नेकपा (एमाले)का तर्फबाट उम्मेद्‍वार भई १६१ मतको अन्तरले विजयी भएका थिए । सामान्य किसान परिवारमा जन्मेका सुवेदी पोखराका स्थापित युवा व्यवसायी पनि हुन् । नेकपा एमालेका कास्की जिल्ला कमिटी सदस्यसमेत रहेका उनी सोही पार्टीका रूपा वडा नम्बर १ र २ का इन्चार्ज हुन् । आफू निर्वाचित हुनुअघि नै उद्यमसँग जोडिएको बताउँदै उनले राजनीतिमा लाग्ने सबै कुनै न कुनै उद्यमसँग जोडिनुपर्ने तर्कसमेत राख्दै आएका छन् ।

यस्ता छन् सुवेदीका प्रतिबद्धताहरूः

• म सिकर्मी, किसान बाउको छोरा हुँ- त्यसैले केही रकम कृषिमा खर्च गर्ने छु ।
• म टुहुरी आमाले हुर्काएको स्वाभिमानी छोरा हुँ- त्यसैले केही रकम टुहुरा/टुहुरी, गरिबहरूका लागि खर्च गर्ने छु ।
• म एउटी मिहिनेती र समझदार श्रीमतीको श्रीमान् हुँ- त्यसैले केही रकम सफल गृहिणीहरूको हितका लागि र महिलालाई उद्यमी बनाउनका लागि खर्च गर्ने छु ।
• म कलाकार दाइको भाइ र गायिका भाइको देवर हुँ- त्यसैले केही रकम कला संस्कृति संरक्षण एवम् प्रवर्धनमा खर्च गर्ने छु ।
• म विद्यार्थी छोरा र छोरीको बाउ हुँ- त्यसैले केही रकम विद्यार्थीको हितमा खर्च गर्ने छु ।
• म हस्पिटल बनाउनुभन्दा खेल मैदान बनाएर निरोगी तथा स्वस्थ जनता बनाउनुपर्छ भन्ने पक्षमा छु- त्यसैले खेलाडी साथीहरूको प्रोत्साहनमा केही रकम खर्च गर्ने छु ।
• म गरिबीलाई आफूले राम्रोसँग चिनेर आएको छु- त्यसैले केही रकम उत्पादनमा लागेका निम्न आय भएका जनताका लागि खर्च गर्ने छु ।
• म सबैको कुरा सुन्ने गर्दछु- त्यसैले छुटेका महत्त्वपूर्ण ठाउँमा रकम खर्च गर्ने छु ।