बालगीत : फूलले देख्यो सपना

 – गोविन्दराज विनोदी

सातै र रङ्ग पोतेर
छिर्बिरे पङ्ख जडेको
फूलले देख्यो सपना
पुतली बनी उडेको

    बास्नाको धूलो बटुली
    बतासभित्र मिसाउँदै
    स-साना नानीहरूको
    मुहारलाई हँसाउँदै
    प्रकृतिसित खेलेर
    मायाको डोरी बुनेको
    फूलले देख्यो सपना
    पुतली बनी उडेको

ताराका साना हातमा
बसेर रात रातमा
जूनलाई हेर्दै हाँसेर
छम र छमी नाचेर
पूर्वको ढोका उघार्दा
सुनौलो बिहान खुलेको
फूलले देख्यो सपना
पुतली बनी उडेको ।

****************

                        गैँडाकोट, नवलपरासी