नानीबाबुको सरसफाइ

              – नरिश्वर गौतम

कति राम्रो देखियो

मैले केश काटेको

बहिनीले कोरेर

फुर्के रिबन बाटेको ।।

काम गर्दा हातले

फोहोरमैला छोएको

साबुन र पानीले

मिचीमिची धोएको ।।

लामा नङ काटेको

जिउ सफा गरेको

दाँत पनि माझेको

म त चट्ट परेको ।।

बाआमाले पकाको

ताजा खाना खाएको

धोइधाई गरेको

सफा नाना लाएको ।।

जुत्ता टाई लगाएँ

किताब् कापी कलम

खाजा पानी घरकै

राखेँ मेरै झोलामा ।।

स्कुल जान भनेर

भएँ म त तयार

हिँड्छु हात समाई

छैन कुनै हतार ।।