फूल राम्रो फुलेछ  (बालकविता)

                       डा. मुकुन्दराज वाग्ले पथिक   

पोहोर साल रोपेको, फूल राम्रो फुलेछ

साना साना कोपिला, मज्जासित झुलेछ ।

भुर्र भुर्र उडेर, चरी पनि आएको

मिठोमिठो स्वरले, गीत राम्रो गाएको

रङ्गीचङ्गी फूलहरू, बगैंचामा फुलेका

चारो खोज्न चराहरू, यताउता डुलेका ।

फूल टिप्नु हुन्न है, प्रकृति नै रुन्छ रे

हरियाली भए त, स्वास्थ्य राम्रो हुन्छ रे

माया गरे रुखलाई, अक्सिजन दिन्छ रे

हाम्रो मन सुन्दर भए, विश्व सफा हुन्छ रे ।