काठमाडौं । चर्चित फुटबलर क्रिस्टियानो रोनाल्डोलाई विश्वकै धनी खेलाडीमा गनिन्छ । खेलकुदबाहेक उनी आफ्नो व्यक्तिगत जीवनका कारण पनि चर्चामा रहन्छन् । यसपटक उनी फेरी गर्लफ्रेन्ड जर्जिना रोड्रिग्वेजको कारण चर्चामा छन् ।

एक रिपोर्टका अनुसार रोनाल्डोले आफ्नी प्रेमिकालाई खर्चका लागि हरेक महिना १ करोड ३२ लाख रुपैयाँ पारिश्रमिक दिन्छन् । एल नेसिओनलले रोनाल्डोले गर्लफ्रेन्डलाई दिने पैसालाई तलब भनेको छ ।

एल नेसिओनलका अनुसार जर्जिना रोड्रिग्वेजलाई ‘छोराछोरीको हेरचाह र अन्य खर्च’का लागि प्रति महिना १ लाख युरो रकम दिइन्छ। यसअघि रोनाल्डोले प्रेमिका जर्जिनालाई अढाइ करोडको कार उपहार दिएका थिए । रोनाल्डो र जर्जिना विलासी जीवनशैली बिताइरहेका छन् । जसको झलक जर्जिनाको सोसल मिडिया अकाउन्टमा देख्न सकिन्छ । जर्जिना र रोनाल्डो सन् २०१७ देखि सँगै छन् ।

जर्जिना पेशाले मोडल हुन् । उनी धेरै ठूला ब्रान्डको विज्ञापनमा पनि देखा परेकी छिन् । इन्स्टाग्राममा उनका ३६ करोडभन्दा बढी फलोअर्स छन् । उनको हरेक तस्विरमा लाखौंले लाइक र कमेन्ट गर्छन् । हालै जर्जिनामाथि बनेको डकुमेन्ट्री ‘आई एम जर्जिना’ मा उनको जीवनका सबै पक्षको चर्चा गरिएको थियो ।

‘द मिरर’को रिपोर्टका अनुसार एक समय पसलमा काम गर्ने जर्जिनाको जीवन रोनाल्डोसँग जोडिएपछि पूरै परिवर्तन भयो । जर्जिना ७५ करोडको आलिशान महलमा बस्छिन्, ९० करोडको याटमा यात्रा गर्छिन् साथै बुगाटी, रोल्स रोयस र फेरारी जस्ता लक्जरी कारहरूमा यात्रा गर्छिन्।

उनको महलमा स्विमिङ पुल, जिम र फुटबल ग्राउन्ड पनि छन् । रिपोर्टका अनुसार उनी हवाई यात्राका लागि निजी जेट प्रयोग गर्छिन् ।