सुरेन्द्र सदिच्छा

पोखरा । पोखराको फूलबारीमा अवस्थित कञ्चनजङ्घा इङ्लिस बोर्डिङ स्कुलले आइतबार आफ्नो १२ औँ एस्.ई.ई. समूहलाई एक कार्यक्रमको आयोजना गरी बिदाइ तथा शुभकामना कार्यक्रम सम्पन्न गरेको छ ।

कक्षा नौका विद्यार्थीहरूले आयोजना गरेको  कार्यक्रम कक्षा नौकै छात्र कृष्ण गुरुङको अध्यक्षतामा सम्पन्न भएको थियो । कार्यक्रममा छात्रा सृष्टि खत्रीले स्वागत् मन्तव्य राखेकी थिइन् । आफ्नो मन्तव्यका क्रममा प्रमुख अतिथि तथा विद्यालयका प्रिन्सिपल मित्रलाल पोख्रेलले विद्यार्थीहरूलाई उच्चतम सफलताका लागि शुभकामना व्यक्त गरे । उनले हरेक गल्तीबाट परिस्कृत हुँदै सफलतालाई पछ्याउन सुझावसमेत दिए । बिदाइ भएर जाने विद्यार्थीका तर्फबाट अश्विन गुरुङले धन्यवाद मन्तव्य व्यक्त गरेका थिए ।

विद्यालय निर्देशक श्रीजङ गुरुङले भौतिक रूपमा टाढा भए पनि विद्यालयको आशीर्वाद सदा विद्यार्थीकै शिरमा रहने बताए । कार्यक्रममा कक्षा नौका विद्यार्थीहरूले विविध सांस्कृतिक कार्यक्रम समेत प्रस्तुत गरेका थिए । विद्यालयको तर्फबाट बिदाइ भएर जाने विद्यार्थीहरूलाई मायाको चिनो प्रदान गरिएको थियो भने कक्षा दसका विद्यार्थीहरूले पनि विद्यालयलाई उपहार प्रदान गरेका थिए । छात्राहरू रिनाशा शर्मा, रोशनी गुरुङ र दिक्षिता गुरुङले कार्यक्रम सञ्चालन गरेका थिए।