पोखरा । चिल्ड्रेन नेपालको आयोजनामा  युवाहरूका निम्ति जीवनोपयोगी सिप तथा वृत्ति परामर्श  तालिम पोखरामा सम्पन्न भएको छ ।

तालिममा जीवन उपयोगी सिपहरू, रुचि र खुबी के हो ?, उद्यम र उद्यमशिलता, रुचि र खुबीअनुसारको क्षेत्र पहिचान, इन्टरनेट र यसको सही उपयोगिताको बारेमा, महिनावारीमा हुने सरसफाइ र होममेड स्यानिटरी प्याडको प्रयोगमा हुने फाइदा र वित्तीय साक्षरता जस्ता महत्त्वपूर्ण विषयलाई  आफ्नो वृत्ति विकाससँग जोड दिँदै सहजीकरण भएको थियो । तलिममा संस्थाको सहयोगमा ११ र १२ कक्षामा विभिन्न सामुदायिक विद्यालयमा अध्ययनरत २१ जना युवायुवतीहको सहभागिता रहेको संस्थाका सहसंयोजक रमेश सुवेदीले जानकारी दिए ।

तालिम समापनको अवसरमा संस्थाका  कार्यकारी निर्देशक डिल्लीप्रसाद शर्माले  युवाले आफ्नो जीवनको सफल प्रगतिका  निम्ति रुचि र क्षमताअनुसारको  उपयोगी सिपको पहिचान गरेर आगामी दिनमा एक सक्षम  र उदाहरणीय व्यक्ति बन्नुपर्नेमा जोड दिए । चिल्ड्रेन नेपालले युवाहरूमा सिप र क्षमता हुनुपर्नेमा विश्वास गर्दै सोहीअनुसार युवालाई यस खालको तालिम सञ्चालन गर्दै आएको उनले बताए । शर्माले  ३ दिनको यस कार्यशालाबाट  सिकेका  विषयलाई उपयोग गर्दै अगाडि बढ्न सुझावसहित शुभकामना दिएका थिए । सहभागीहरूले तीन दिनको तालिम अत्यन्तै प्रभावकारी र जीवन उपयोगी  भएको कुरा बताएका थिए । सहभागीले सिकेका विषयलाई व्यक्तिगत जीवनमा कार्यान्वयन गर्दै अगाडि बढ्ने कुरामा जोड दिएका थिए । तालिम कार्यशालालाई संस्थाका बालबालिका, युवा तथा परिवार कल्याण शाखा प्रमुख शारदा शर्मा तथा सहायक संयोजक सुनिता तिमिल्सिना, लीला न्यौपाने र विशाल घोतानेले  सहजीकरण गरेका थिए ।