अनेसासको विश्वव्यापी कविता महोत्सवमा कवि जगन्नाथ पौडेल प्रथम

अनेसास कविता महोत्सव २०२३ मा अमेरिकाको भर्जिनिया निवासी जगन्नाथ पौडेल प्रथम भएका छन् । प्रतियोगिताका लागि प्राप्त ३ सय एक कवितालाई उछिन्दै उनको कविता ‘न्युयोर्कभरि सगरमाथा’ प्रथम भएको हो । साहित्यकार वियोगी बुढाथोकी, रोशन थापा नीरव र सुस्मिता नेपाल निर्णायक रहेको समितिले ललितपुर नेपालका ऋषभदेव घिमिरेको कविता द्वितीय र आनन्द श्रेष्ठ( न्यूजर्सी, अमेरिका), मदन घिमिरे ( कास्की, नेपाल) र सुमन शिरिष (सिन्धुपाल्चोक, ,नेपालको कवितालाई तृतीय घोषित गरेको छ ।

राष्ट्रकवि माधवप्रसाद घिमिरेको जन्मजयन्तीको अवसर पारेर अन्तर्राष्ट्रिय नेपाली साहित्य समाजले आयोजना गर्दै आएको यो तेस्रो संस्करण हो ।

अनेसासका संस्थापक अध्यक्ष होमनाथ सुवेदीको प्रमुख आतिथ्यमा आयोजित उक्त कार्यक्रममा अनेसास बिओटी सभापति पदम विश्वकर्माले शुभकामना व्यक्त गरेका थिए भने सल्लाहकार प्रतीक ढकालले घिमिरेको साहित्यिक योगदानका बारेमा चर्चा गरेका थिए ।

अनेसासका केन्द्रीय अध्यक्ष गोवर्द्धन पूजाको सभापतित्वमा सम्पन्न कार्यक्रममा राष्ट्रकविका छोरीद्वय ज्योति पौडेल र शान्ति घिमिरेका साथै अनेसासका उपाध्यक्ष राजेन्द्र श्रेष्ठ, डा. रेणुका सोलु, महासचिव विमला निरौला, सदस्य तारा अधिकारीले मन्तव्य राखेका थिए भने  एकसय एकजना कविले कविता वाचन गरेका थिए। जूममा करिव छ घण्टा चलेको उक्त कार्यक्रमको पुरस्कार रकमलाई क्रमशः तीर्थ पाण्डे, ईश्वरी भट्ट, तीर्थराज अधिकारी,नेत्रवन्धु पोखरेल र सम्झना अर्यालले प्रायोजन गरेका थिए ।

प्रथम पुरस्कार प्रायोजकःतीर्थ पाण्डे, द्वितीय पुरस्कार प्रायोजक ईश्वरी भट्ट, तृतीय पुरस्कार प्रायोजक तीर्थराज अधिकारी, तृतीय पुरस्कार प्रायोजक सम्झना आचार्य र नेत्रवन्धु पोखरेल रहनुभएको छ ।

कविता महोत्सव तथा प्रतियोगितामा नेपाल, अमेरिकाका ५० राज्यहरू, नर्वे, भारतका मुम्बई, असाम, सिलगडी, दार्जीलिङ लगायत, साउदी, कतार, नर्वे, पोर्चुगल, ईजरायल, अस्ट्रेलिया, क्यानाडा, कोरिया, बेलायत, बेल्जियम र अफ्रिकाबाटसमेत कविहरूले भाग लिएका थिए ।