पोखरा, चैत १६ गते । नेपाल शिक्षक महासङ्घ, भिमाद नगरपालिका, तनहुँको अध्यक्षमा सुरज लम्साल सर्वसम्मत चयन भएका छन् ।
जनज्योति माध्यमिक विद्यालयका शिक्षक लम्साल नेपाल राष्ट्रिय शिक्षक सङ्गठन, भिमादको निवर्तमान अध्यक्ष हुन् । साहित्यकारसमेत रहेका लम्सालको सहलेखनमा रहेको ‘कार्यमूलक नेपाली व्याकरण, बोध तथा अभिव्यक्ति (कक्षा ६-१०)’ नेपाली विषयका शिक्षक र विद्यार्थीमाझ निकै लोकप्रिय बनेको छ । प्रविधिमा समेत रुचि राख्ने लम्साल शिक्षा तालिम केन्द्र, गण्डकी प्रदेशका नेपाली विषयका रोस्टर प्रशिक्षक पनि हुन् ।
शनिवार सम्पन्न प्रथम अधिवेशनबाट महासङ्घको सहअध्यक्ष केशवराज तिमिल्सेना, उपाध्यक्ष श्रीकान्त उपाध्याय, महिला उपाध्यक्ष ईश्वरी पाण्डे अधिकारी, सचिव केशवराज कँडेल, महिला सहसचिव बुद्धिमाया थापा र अर्थ सहसचिव मदनकुमार थापा चयन भएका छन् । त्यसै गरी सदस्यहरूमा दर्शन थापा, गोविन्द सिग्देल, गीता श्रेष्ठ, जीमाया थापा, मनिषा लम्साल, पदम राना, कमलकान्त सुवेदी, सुजन ढेवाजू, माधवी सिग्देल, भीष्म राना मगर र योगबहादुर नेपाली रहेका छन् । समितिमा केदारनाथ सिग्देल, केशरबहादुर खड्का र महेन्द्र सिग्देल पदेन सदस्य रहेका छन् ।
कार्यक्रममा भिमाद नगरपालिकाका प्रमुख दधिराज सुवेदीले भिमादको शैक्षिक सुधारमा सँगसँगै हातेमालो गर्न महासङ्घसँग आग्रह गरे । महासङ्घ जिल्ला अध्यक्ष चन्द्रमणि कोइरालाले वर्तमान आन्दोलनमा सम्पूर्ण शिक्षकहरू एकाताबद्ध भएर लाग्न आह्वान गरे । शिक्षा उपसचिव सन्दिप पौडेलले शिक्षकको पेसागत विकासका साथसाथै शैक्षिक सुधारमा महासङ्घको सक्रियता रहनुपर्ने बताए । नेपाल राष्ट्रिय शिक्षक सङ्गठनका तनहुँ जिल्ला अध्यक्ष बाबुराम रानाभाटले भिमाद शिक्षक महासङ्घले उदाहरणीय काम गर्ने आशा व्यक्त गरे ।
सचिव शिक्षक सङ्घका सचिव विजयराज गौतमको सञ्चालनमा भएको कार्यक्रममा जनज्योति माविका प्रअ गणेश सुवेदी, शिक्षक सङ्घ, भिमादका अध्यक्ष केदारनाथ सिग्देल, एकीकृत अखिल नेपाल शिक्षक सङ्गठनका महेन्द्र सिग्देललगायतले बोलेका थिए ।
यहाँ प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक र ट्विटरमा पनि जोडिन सक्नुहुन्छ । हामीसँग तपाईं
फेसबुक र
ट्विटरमा पनि जोडिन सक्नुहुन्छ ।
Advertisement
