पोखरा, असार ३२ गते । नवगठित गण्डकी प्रज्ञा प्रतिष्ठानका पदाधिकारीहरूलाई गीतकार प्रतिष्ठान, नेपालले बिहिवार बधाई तथा शुभकामना व्यक्त गरेको छ ।

प्रज्ञा प्रतिष्ठानको कार्यालयमै पुगेर गीतकार प्रतिष्ठानका पदाधिकारीहरूले बधाईसहित सफल कार्यकालको शुभकामना व्यक्त गरे । प्रतिष्ठानका संस्थापक अध्यक्ष हरिहर खनियाले प्रज्ञा प्रतिष्ठानका कुलपति प्रा.डा. कुसुमाकर न्यौपाने, उपकुलपति शङ्कर विरही गुरुङसहित गीतकार प्रतिष्ठानका अध्यक्ष अनुराग अधिकारीलगायतका प्राज्ञ सभाका सदस्यहरूलाई खादा लगाएर सम्मान गरेका थिए । खनियाले गण्डकी प्रदेशको वाङ्मयको उत्थानका लागि प्रज्ञा प्रतिष्ठानले थप टेवा दिने विश्वास व्यक्त गरे । उनले गीतकार प्रतिष्ठान सहकार्य गर्न सधैँ तयार रहेको भनाइ राखे ।

नवनियुक्त कुलपति न्यौपानेले गीतकार प्रतिष्ठानसँग मिलेर केही कार्यक्रमहरू सञ्चालन गर्ने जनाउँदै प्रतिष्ठान सबैको साझा भएको बताए । उनले यो कार्यकाल उदाहरणीय बनाउने अभियानमा लाग्ने योजना सुनाउँदै यसको गरिमालाई थप उचाइमा पुर्‍याउने प्रतिबद्धता जनाए ।

प्रतिष्ठानका सचिव रुपिन्द्र प्रभावीको सहजीकरणमा भएको बधाई तथा शुभकामना कार्यक्रममा उपाध्यक्ष लाल कार्की, सदस्य जमुना बराल र आजीवन सदस्य कमला श्रेष्ठले प्राज्ञहरूलाई बधाई दिएका थिए ।